Die Schaamreise

Von Nernberg kam dorch unser Stadt
E Mann, der selt en Lade hat,
Un mit ’me hiesige Hannelshaus
Geschäfte mecht, Jahr ei, Jahr aus.

Un in die Fahrgass, uff’s Kandor,
Da kam der Mann un stellt sich vor,
Un daß er sich die Freiheit nähm,
Weil er doch grad dorch Frankfort käm.

Er wollt’ de Rhei enab bis Deitz
Un dann zurick un dorch die Schweiz,
Vielleicht ääch nach Baries, wer wääß,
Er wär uff seiner Hochzeitsrääs.

Und’s segt em eißerst artig da
Der Hannelsherr: Deß fräät mich ja!
Ihr Hochzeitsrääs? no, deß is schee;
Merr krieht ihr Weibche doch zu seh?

Se schenke mir un meiner Frää
Doch heut die Ehr noch alle zwää?
Un esse mit? un fahrn hernach
Ääch mit uns aus de Nachmittag?

Merr zeige Ihne da die Stadt:
Die sehr viel Sehenswerthes hat:
Die Juddegass, de Kaisersaal,
De Dom, und’s Heilig-Geist-Spidal.

De Remer und’s Versorgungshaus,
Die Paulskerch un de Friedhof draus;
Des Aarmehaus, am Zuchthaus dicht.
Die Post un unser Stadtgericht, …

De Russisch Hof, de Guttenberg,
Des Errenhaus, die Liebfrääkerch,
Sammt Malakof; Sie sein eweck;
De Göthe un des Ferschte-Eck.

De Kunstverei, die Ledderwaag,
Sodann de Sitz vom Bundesdag,
Un Peterschkerchhof ääch, de alt,
Des Berjerstift, de Winterhalt.

Die Börs’ ääch zu vergesse net!
Des zooplast’sche Cabinet;
Die Promenad von unserm Rinz
Un ääch die Mehlwaag un die Minz.

Ääch Sachsehause un die Zeil
Mi’m Böhler, Jaquet, Bing un Breil;
Die Leweapothek am End,
Wie ääch des Hesse-Monument. – –^[1]

Un sonst noch viel un allerlää
Deß dhun merr zeige Ihrer Frää,
Un hawwe merr des uns beseh,
So dhun merr in die Määlust geh.

Da odder segt von Nernberg der:
Ja wann mei Fraa nor bei mer wär!
In Nernberg odder is derr die,
Ich bin allää in Frankfort hie.

Dann mei Geschäft erlääbt des net,
Daß merr verlasse des sell zwett,
Ich habb en Lade un Kandor
Un ääch en äänz’ge Lehrling nor.

Wann merr da bääde wollte geh,
Des geb e Werthschaft ja, e schee!
Des dhet net geh, baleiwe! nää!
Drum mach die Schaamrääs ich allää.