Im Weargliachat


[172]

Im Weargliachat.[1]

„Wôlli,[2] Buaba, uß de Ziacha[3],
Jucket[4] keack in d Hosa nei’,
Wôlli, ouf, ma’ gôht ge liacha!
Want er denn di Letschti sei’?

5
Z Ôbed ka’ ma’ wieder gruaba[5],

Jetza flink an d Arbet nous!“
Sait der Vater, und dia Buaba
Hupfet uß de Pfulba[6] rous,

Beatet gschwind da Morgaseaga,

10
Langet d Löffel uß der Lad,

Thant a Pfanna Muas ousfeaga:
„Vaterle, mer kommet grad!“

D Magd staußt d Läda nous an d Reiber[7],
Fürbt[8] dernô noh d Stuba gar,

15
D Muater gôht mit diesi[9] Weiber

Schau’ ins Wearg, denn d Zeit ischt rar.

[173] Jede liacht en Jau’[10] fürani[11],
Will da gräuschta Baussa[12] hau’,
Und die dicki wia die rahni[13]

20
Want it foul dahinta stauh’.


S wead derweil so umma Neune,
D Jeassazoina[14] bringt der Bua,
D Krousa[15] mit der Mill[16], koi’ kleine,
Mit em weißa’n Uebertua.[17]

25
Und dia Liacher lieget, hocket

Uff da Boda, wias en gfällt,
Und in d Schüssel weads jetz brocket,
Bis as d Löffel oufreacht stellt.

Nais[18] und Nysi[19] jeasset zaischta,

30
Und se trialet schiar in d Wett;

Freili haunt se au am meischta,
Schiar füar fainfe, Hunger ghett.

Kriaget doch dia arme Tropfa
Nia koi’ Mill im Hiatahous,[20]

35
Müasset d Bäu[21] mit Braut verstopfa

Und mit Wasser schwenka’n ous.

[174] Aber was ischt dött im Au’ser?[22]
Ischt as it der Brenntawei’?
Jô, a Guttra[23] wia a Gau’ser![24]

40
S Bescht kommt gmoingle hintadrei’.


Was doch so a Budel machet,
Wenn sen rum im Roiha launt!
Wia dia Liacher Scholla[25] lachet
Und a Gschroi und Lusi[26] haunt!

45
„Jetz isch Höri,“[27] sait der Vater,

Schuibt dia Guttra wieder ei’,
„S wead a’fanga z lout des Gschnatter,
Und mei’ Wearg muaß glocha sei’!“

Wia se jetz fürani schreitet,

50
Wia se liachet noh so ring!

Aih ma’ d Weiberschröcki[28] läutet,
Stôht nu’ noh a Fiderling.[29]

D Weiber schlupfet jetz in d Juppa,
Gauhnt in Fleacka gschwind voara’,

55
Denn se müaßet richta d Suppa,

Daß ma’ z Zwölfe jeassa ka’.

[175] D Tisch sind gricht und d Stüahl und d Schranna,
Jetz nu’ rei’ zum Gabelgfeacht!
S stauhnt zwua graußi Nudlapfanna

60
Siedig uff de Pfannakneacht.


S Weißbier in der Körbikrousa[30]
Druckt bereits da Simbsa ra,
Thuat as au it feindle[31] sousa,
Schwemmts doch Schmotz und Nudla na.

65
D Liacher thant in d Stuaba treata,

D Weiber wischt und d Manna hott,[32]
Fanget a’ gem Jeassa beata.
Und se hudlet – s ischt a Spott.

Und se sitzet glei in Roiha,

70
Wias der Vater gornat[33] hôt,

Und se thant si so vermoia,[34]
Daß ma’ nix maih überlôht.

Zaischta kommt a Küachlasuppa,
Aber s ma’ se koiner dünn,

75
S schwimmet Brocka rum wia d Gruppa[35]

In der graußa Schüssel dinn.

[176] Nôcha kommet gschupfti[36] Nudla,
Krout und Streichat[37] sind derbei -
„Hebet[38] Sorg und thant it hudla,

80
D Küachla kommet au gauh glei!“


D Krousa gôht jetz rum im Roiha
Und ma’ feucht dia Nudla’ ei’.
Denn ma’ müaßts suscht mit der Hoia[39]
In dia Mäga stampfa nei’.

85
Endli kommt der öbrischt Sprissel[40]

Von der Himmelsloiter au,
D Bäuri bringt a Küachlaschüssel
Aellbereits a’n Ehla hauh.

Dutzad Händ dia sieht ma’ greifa

90
Mitanand in Küachlabearg,

Koiner könnt ui jetz maih pfeifa,
Gälts en goldna Baussa Wearg.

Und s pureutig[41] Schmalz lauft hanna,[42]
Danna[43] an de Mäuler na,

95
Jedes thuat uffs schmotzigscht spanna,[44]

D Grait[45] wia d Gull[46] und d Alea.[47]

[177] Aber zletschta muaß ma’ houfa,[48]
Endli ab die Küachla lau’,
Bärig ka’ ma’s maih verschnoufa

100
Und der Vater beatet schau’.


Und der Vater, suscht fürani,
Macht as desmôl küzer a,[49]
S gfällt em it des lahm Sagani:[50]
„Gaunt jetz nu’ in Tenna[51] na!“

105
Bärig gsait, so hairet älli,[52]

Machets Kreuz und dousset futt,[53]
Stealzanazi[54] mit em Gälli,[55]
D Wuzamei[56] mitsannt der Schlutt.[57]

Haunt im Tenna au’verdrossa,

110
Wias des Gschäft von seall so geit,

Stiefel, Toffla, Schuah und Bossa[58]
Zaischta ällz uff d Seita keit,[59]

Bôarfuß nôch in d Schalta[60] gstaußa
Zwears dur d Schuir da Riffelbom,[61]

115
Denn bei so vel Dutzet Baussa

Broucht ma schau’ a mächtigs Trum.

[178] Sind dernô an d Riffla gstanda
Uff da Tenna feucht und häl,[62]
D Manna hanna, d Weiber danna,

120
Paar und Paar an jedem Strähl.[63]


Bolla[64] fallet ganze Häufa
Mit de dürre Blättla na.
D Riffler thant jetz singa, pfeifa,
Au anand uff d Bückel schla

125
Mit de schweri Bollasanga,[65]

Freili gschieht es nu’ im Gspaß,
Aber s wead derbei ma’ manga
Denischt doch a'n Aeugle naß.

Nysi woißt so alti Schnôka,[66]

130
Zennat[67] wia’n a bißger Goul

Und verzuiht druff zum a Hôka[68]
Wieder glei s Hanswuschtelmoul.

D Buaba, d Mädla, d Weiber lachat,
S ischt a reachti Kugelfuahr,[69]

135
S gôht, wenn Alti Possa machet,

Bei de Jungi über d Schnuar.

[179] Wäger, dô ischt au so ganga,
Haunt anand bereits verküßt.
„Halt, i will ui s Weatter sanga!“[70]

140
Sait der Vater, „hau’s it gwüßt,


Daß er so vol Bosget[71] steackat.
Seahnt er dô da Hagaschwanz?[72]
Schla gauh’ glei äll ôdragfleackat,[73]
Laß koi’ Nôht am Kittel ganz.

145
Launt dia Theama,[74] sag i, schaffet,

Fallet d Läus von ui aweag;
Wenn er nu’ uff d Narra gaffet,
Gôht dui Arbet it vom Fleack.

Und iahr alti Esel, hairet,

150
S Schaffa stünd ui besser a’,

Wenn er dô, statt daß er stairet,[75]
Hofreacht[76] müechtet[77] au da’ Ma’.

Singa, Johla, Gspäß in Aihra!
Was oin in der Orning deucht,

155
Ma’ i seall beim Schaffa haira,

Denn as macht oim d Arbet leicht.

[180] Aber d Juged so verfüahra,
Schla mi s Bläßle, gôht it a’.
Siehni nomôl karassiara,

160
Schlani äll in Tenna na’.“ –


Saits und luagat fuirig ummi,
Aber s muckt se koiner maih,
It der Veri,[78] it der Dommi,[79]
It der Veit und Batlamai,

165
Gschweigis d Grait und d Nais und d Zilla,[80]

D Zofei,[81] d Mei und d Ulia’,[82]
O dia sind so mäuslestilla,
Daß ma’ Leinset[83] säa’ ka’.

Und der Vater wôrflat d Bolla

170
Hintre gegam Deichselloch,

D Buaba müasset Fuater holla,
Und so bschluißt ma’ d Liacharwoch.


  1. ↑ Flachsausraufen.
  2. ↑ Weidlich, hurtig.
  3. ↑ Bettüberzug.
  4. ↑ Hüpfet.
  5. ↑ Ausruhen.
  6. ↑ Bettkissen.
  7. ↑ Schließen.
  8. ↑ Kehrt.
  9. ↑ Den anderen.
  10. ↑ Streifen.
  11. ↑ Vorwärts.
  12. ↑ Bund.
  13. ↑ Mager.
  14. ↑ Korb mit Essen.
  15. ↑ Krug.
  16. ↑ Milch
  17. ↑ Uebertuch.
  18. ↑ Agnes.
  19. ↑ Dionys.
  20. ↑ Hirtenhaus.
  21. ↑ Bäuche.
  22. ↑ Brotsack.
  23. ↑ Flasche.
  24. ↑ Gänserich.
  25. ↑ Schochen.
  26. ↑ Fest.
  27. ↑ Zeit zum Aufhören.
  28. ↑ Das Glockenzeichen mittags 11 Uhr zum Kochen für die, welche auf dem Feld sind.
  29. ↑ Rest.
  30. ↑ Kirchweihkrug.
  31. ↑ Stark.
  32. ↑ Links, rechts.
  33. ↑ Geordnet.
  34. ↑ Erlustigen.
  35. ↑ Groppen, kleine Fische.
  36. ↑ Mit den Händen gewellte.
  37. ↑ Niederschlag von zerlassener Butter.
  38. ↑ Haltet.
  39. ↑ Stampfschlegel.
  40. ↑ Sprosse.
  41. ↑ Pur.
  42. ↑ Hüben.
  43. ↑ Drüben.
  44. ↑ Abheben.
  45. ↑ Gret.
  46. ↑ Regula.
  47. ↑ Eulalia.
  48. ↑ Zurück gehen.
  49. ↑ Kürzer ab.
  50. ↑ Dahersagen.
  51. ↑ Scheune.
  52. ↑ Hören auf.
  53. ↑ Schleichen fort.
  54. ↑ Stelzen-Ignaz.
  55. ↑ Gallus.
  56. ↑ Wurz-Maria.
  57. ↑ Unname.
  58. ↑ Halbstiefel.
  59. ↑ Geworfen.
  60. ↑ Wandsäule.
  61. ↑ Hechelbaum mit eisernen Kämmen oder Riffeln zum Abraufen der Bollen d. h Samenkapseln.
  62. ↑ Schlüpfrig.
  63. ↑ Kamm.
  64. ↑ Samenkapseln.
  65. ↑ Flachsbündel.
  66. ↑ Schnurren.
  67. ↑ Bleckt die Zähne.
  68. ↑ Hacken.
  69. ↑ Narrenspiel.
  70. ↑ Segnen.
  71. ↑ Bosheit.
  72. ↑ Farrenschweif.
  73. ↑ Otterfleckig, bunt.
  74. ↑ Dummheiten.
  75. ↑ Störet.
  76. ↑ Frischweg.
  77. ↑ Machtet.
  78. ↑ Xaver.
  79. ↑ Dominikus.
  80. ↑ Gret, Agnes, Cäcilia.
  81. ↑ Sophie.
  82. ↑ Juliane.
  83. ↑ Leinsamen, man braucht stilles Wetter zum Säen des Leinsamens.
Dieser Artikel wurde von Wikisource herausgegeben. Der Text ist unter Creative Commons Attribution-Share Alike 4.0 verfügbar, sofern nicht anders angegeben. Für die Mediendateien können zusätzliche Bedingungen gelten.