„Aber wie höchlichen er gleich das genieß, hat er doch betrachtet die guetthatten und gnaden, im in seiner jugent von herzog Ulrichen von Würtemberg beschehen, und hat sich wider den herzogen in seinem vertreiben und verjagen in dienst nit begeben wellen oder auch ainicherlai weis wider ine handeln, geschweig, das er vom landt Würtemberg an sich zu ziehen het sollen.“

„Als nun her Gotfridt Werher sich also in kriegs- und ander sachen so wol gehalten, zu dem er ain herliche, schöne, gerade person, wardt er von herzog Ulrichen und menigclichen lieb und wert, auch hoch gehalten und herfür gezogen. (…) Derhalben, als er sich dermaßen so heuslich und wol angelassen, sein ime vil trefflicher und gelegner heirat zugestanden… So ist zu wissen, das graf Hörman von Henneberg von seiner gemahl, der marggrefin von Brandenburg, neben andern kündern ain dochter, genannt frölin Appolloniam, überkommen.“

„Diese zwai frölin waren geschwistergit kündt und waren über die maßen schön, darzu wurden sie in aller zucht und gueten geberden uferzogen. (…) dem frölin von Henneberg wardt herr Gottfridt Wernher über die maßen holdt, also das er durch iren willen mit rennen, stechen und allem ritterspill sich also herfür thette, das sie nit weniger liebe und willen zu ime überkam. Herzog Ulrich, der dann herr Gotfriden Wernhern sonderlichen mit gnaden gemaint, wie er das erfure, hette er wol megen leiden, das solcher heirat mit guetem willen und wissen grave Hörmans, ires herrn vatters, were beschehen, derhalben, wie er mehrmals geen Nürtingen raisete und die alt fürstin haimsuchte, name er allweg herr Gotfridt Wernhern mit, zu zeiten lude auch der herzog die fürstin mit irem frawenzimmer uf die jagen oder das hirßgeschrai. So befliße sich dann herr Gotfridt Wernher, der nechst bei dem frawenzimmer zu sein. Er machte der alten fürstin vil kurzweil mit seinen historien und gueten sprüchen, also das sie in vor andern sonderlichen wol bei und umb sich haben megte.“

„Sie het ain gewonhait, so der herzog oder andere frembde fürsten zu ir geen Nürtingen kommen und das sie herrn oder vom adel mit sich prachten, so megten dieselbigen nach dem nachtessen in das frawenzimmer geen, mit den frölin und junkfrawen sprachen; so baldt es aber acht uhren geschlagenm, schieden die herrn und junkern widerumb ab. Begab sich ainsmals, das ano 1509 herzog Ulrich die herzogin von Nürtingen uf ain jagen lude, nit fer von Denzlingen. Alda fiengen herr Gotfridt Wernher und herr Dieterich Spett ain rennen und stechen an, kamen am wasser zusamen. Der ain war herr Lanzlot, der ander herr Gabon. Unlangs darnach kam herzog Ulrich an sant Bartolomes abendt geen Nürtingen. Nach dem nachtessen saß herr Gotfridt Wernher zu dem frölin von Henneberg; dieweil aber dieselbig nacht ain groß ungewitter kam, blib der herzog, die herzogin, auch menigclichen über die zehen uhren herfor. Dozumal haben herr Gotfridt Wernher und das frölin Appolonia ainander die ehe vehaißen doch dabei veranlasset, das sie sollichs beiderseits zwai jahr verschwigen und verhalten wellen.“

„… ir herr vatter beger ir, das sie zu im kom, er welle sie mit klaidern und aller nottdurft ußrüsten und darnach ehrlichen widerumb abfertigen. Aber nach langer handlung und genommen bedacht hat frölin Appolonia vor der herzogin und menigclichem die antwurt gegeben, sie welle uf dizmal nit zu irem herrn vattern. Haben die hennenbergischen gesandten gesagt, so haben wir den hingang für den hergang, haben sich damit wider in ir herbig verfüegt.“

„Es ist nit lang angestanden, das geschrai ist in die stat kommen, die straßen und velder halten vol reuter. So baldt das die Franken erfahren haben, sie wol gedenken künden, von wesswegen dise reuterei angesehen und, wo sie nit zeitlich sich versehen, iren übel noch gewartet megen werden. (…) haben sie für die stat zu herrn Gotfridt Wernhern geschickt und gebetten, das er sie im friden widerumb zu irem herren raisen lassen welle (…) Also hat inen herr Gotfridt Wernher widerumb zuempotten, waverr sie nit mehr leut mit inen hinfüeren, als sie mit inen gepracht, so sollen sie sein sicher und ihres gefallen raisen.“

„Hierauf herr Gotfridt Wernher geen Mösskirch sich verdüegt. Daselbst het ihm sein brueder, herr Johann Wernher, das schloß geraumpt. Also vergingen nit gar zwen monat (1511), es ritten die zwen gebrueder, herr Johann Wernher und herr Gotfridt Wernher, mit ainandern geen Nürtingen, das frölin Appolloniam zu holen. Herr Johanns Wernher nam sein gemahl, die schenkin von Erpach, mit ime, die fuer in ainem wagen (…) Sie bliben nit lang alda, theten im schloß blößig ain trunk. Das frölin ist nit im wagen gefahren, sonder hünder herr Gotfridt Wernhern geen Mösskirch geritten (…) Als sie dohin ankomen, hat die alt grefin von Ötingen, herr Gotfridt Werhers fraw muetter, auch beider herrn schwester, die abtissin von Zirich, die gest empfangen, und wie noch die alten darvon sagen, so ist es zu eim kleinen, eingezogenen wesen ein holdsellige und fröliche hochzeit gewesen.“

„Ich kann nit underlassen, ein historia von ime zu vermelden, darauß sein grim und ernstlichs gemüet gegen denen kindern, auch gegen denen, die das nit beschuldt, vermerkt wurt. Nachdem als sein gemahl, die marggrefin von Brandenburg, mit todt abgangen, hat sie im vier söne, auch drei döchter verlassen, under denen döchtern er ain, fröle Appel, zu seiner geschwien, der herzogin von Würtemberg, geen Nürtingen gethon, die ander hat er in der jugent in ain beschlossen closter beredt, die dritt ist im landt zu Franken in ainem freien gestift erzogen worden. Als nun fröle Appel mit herr Gotfriden Wernhern sich vermehlt, hat er besorgt, s in jüngere dochter im freieen gestift megte dergleichen ihres gefallens auch heiraten, derhalben er sich gegen niemandts seins fürnemens vernemen lassen, hat dieselb dochter zu im uf ain vastnacht beschriben, und als sie etlich tag bei im und er ganz frölich mit ir gewesen, hat er sie beredt, sie soll zu irer schwester, die dann im beschlossenen closter gewest, faren und ein tag etlich bei ir sein, sie ainmal heimsuchen. Das guet jung mentsch is fro gewesen, das sie zu ir schwester einmal kommen soll, die sie in viel jahren nit gesehen, hat irem herrn vatter wol vertrawt und keins solchen trugs sich besorgt, ist guets willens zu irer schwester ins closter gefaren. Darneben aber hat ir vatter der äbtissin in solchem closter geschriben, sein dochter, ob die gleichwol herauß begern, solle sie doch die darin behalten und keinswegs herauß lassen, dann er das vorhabens, ir lebenlang sie darin zu halten. Dass ist also beschehen, und hat das guet jung mentsch, so, wie gehört, von irem leibchen vatter in das closter getrogen und darin gewaltigclichen, wider irn willen, um unschuldt enthalten worden, ir leben in großem kommer und enden mueßen.“

„Es hatte zwar Herzog Ulrich mehrere Liebe und Zuneigung zu Marggraf Friderichs von Brandenburg Fräulein Tochter, Elisabeth, einer schönen und holdseligen Prinzessin, welche sich bey seiner Schwester (falsch, richtig ist Tante), Herzog Eberhards des jungen Wittwe, Frauen Elisabeth, auf ihrem Widdum zu Nürtingen, aufgehalten, daher er zum öftern zur Sommerszeit nach dem Nachtessen mit einem Trommeter, der ein sehr guter Zinckenbläser gewesen, nach Nürtingen geritten und ermeldtem Fräulein, die hernach noch in disem Jahr, an Marggraf Ernsten Von Baden versprochen, und an ihn um Michaelis zu Pforzheim getrauet worden, seinen Besuch gemacht; allein der Ehe-Verspruch zwischen ihm und Fräulein Sabina war allzuhoch betheuert, und bereits im vorigen Jahr durch den Handstreich bestetigt, daß die Sache nicht mehr zu ändern, und nichts übrig war als die Ehe durch wirkliche Antrauung fest zu machen.“

„allainzu wissen, das herr Gotfridt Wernher, nachdem er also verheirat, sich hinfüro mertails anhaimsch gehalten, wenig an die höve oder anderswahin geritten, sondern im fürgenommen, das schloß Wildenstain, dohin er von jugent uf ain liebe gehapt, zu der wer zu erbawen, wie er auch und mit meniclichem uncosten getho; dann er alda ain dieven graben in den felsen durch den perg hindurch brechen lassen und an dem graben, auch an dem schloß ob den vierzig tausendt güldin verbrochen und verbawen (…)“

„Er ist willens gewest, wover er ain sone von seiner gemahl von Henneberg überkommen, ein stetlin für das schloß Wildenstainzu bawen, hat den ganzen blatz vor dem stetlin, ist iezmalls ain wisswachs, biß an berg mit ainer starken ringmauer einfassen wollen, und fürwar, es were ain großmüetig werk worden, dann das stetlin das schloß zu rugk het gehapt, beid seiten, demnach der felsen hoch und gehe, sturmfrei; under augen het es ain diefen graben mit zweien grosen egkthürnen gehapt, mit zwain thoren, das ein gegen Lübertingen, das ander gegen der Tonaw und dem Buchpronnen. Die inwoner des stetlins weren die mair zu Lübertingen gewest, die hetten ire velder zu Lübertingen ußer disem stetlin bawen müesen, wie dann vor jaren vil gebewes von schlösern und stetlin uf solchem berg gewest.“

„Aber wie ain dochter darauß wardt, bekömmert er sich hoch, darum endert er sein fürnemen und stande von allem dinkwerk, damit ist die new statt underbliben. Es hetten im drei vom adel, namlich herr Dieterich Speet, herr Ruodolf von Ehingen und herr Conradt Dreisch, genannt der lang Hess, all drei ritter, ieder drei tausendt guldin in goldt zu bawsteur daran zu erschießen sich anerpotten, soverr ir iedem ain behausung alda zu erbawen und öffnung zu haben, vermeg aines burkfridens, dess sie alberait sich vergleichen und entschlossen hetten, wer vergönt worden. Aber der allmechtig, güetig Gott hat solchs vorhaben der edelleut underkomen, dann sonst die herrschaft Zimbern allain herr Dieterich Speeten halb abermals in die eußerst gefahr oder villeucht zu aim entlichen verderben het gerathen megen.“

„Es waren zu Mösskirch etlich haimlich schuelen, da warden winkelpredigen gehalten und allerlai meutereien angericht. Dieselbigen brüeder wollten ain evangelisch leben zu Mösskirch anrichten und vermainten, alle unkeusche in der statt, so userhalb der ehe bescheh, abzustellen, und wollten keine in der statt dulden, so mit solchen handlungen beschrait oder verargwonet were. Und damit aber solchs abgestelt, hielten sie ain gemaindt darumb, wie sie domals auch, unersucht der obrigkait, alle tag pflagen zu gemainden, und wardt von dem mertail gepöfel ainhelligclichen dahin geschlossen, das nan solche beschraite personnen uß der stat weisen und alle unzuchten sollen abgeschnitten sein.“

„Es war aber ainer under inen, ain spaifogel, genannt Jörg Schüßlendreher, der biß daher geschwigen. Wie der das dorecht plebiscitum höret, spricht er unverdacht: »Lieben freundt, so ir die verargkwonnten und armen sündernen alle uß der stat zu jagen vorhabens, ist zu besorgen, es werden unser ainsteils selbs kochen müesen.« Das hat der pöffel so hoch ufgenommen, das sie gleich anfahen über in schreien und zu im greifen, und er were von inen in sollicher furia domals umbracht worden, aber warde von etlichen seinen gesellen mit groser müch und vil gueten worten von inen errettet. Noch waren sie nit zufriden, und wolt der vogt daselbs, Gangolf Örtlin, nit ains uflaufs von dem gemainen man der dorechten ansprach halben erwarten, so muest er den armen Schlüßlendreher fahen und einlegen. Der wardt also den herren Omnes zu gefallen etlich tag iin ainer, gleichwol gnedigen, gefenknus enthalten.. Hiezwischen wardt herr Gottfriedt Wernher aller sachen nachlengs bericht; der bevalch dem vogt, den gueten man, der gleichwol nichts verschuldt, dann das er die warhait gesagt, wider ledig zu lassen.“

„Herr Gotfridt Wernher brantschatzet seine pauren, iedoch leidenlich; wie hoch aber solche brandtschatzung geloffen, hab ich nie erfaren kinden. Er ließ im die paurn allenthalben in der herrschaft von newen wider schweren. Die erkannten iren abfah und ungehorsame und schwuren mit guetem willen. Als seine ambtleut und bevelchshaber geen Hewdorf kamen, die huldigung daselbs zu empfahen, als auch beschach, war ain Böser paur alda, genannt der rote Staud, und wie die andern underthonen alle mit ufgehepten fingern schwuren, wollte er kein handt oder finger ufheben. Wie er darum befragt, was er damit gemaint, gab er zu antwurt, er hette den vorigen aide nit gehalten, besorgend, er mechte den auch nit halten. Dieser boshait dEs pauren ward herr Gotfridt Wernher zeitlich bericht, der ließ in fengclichen einziehen, der mainung, in für recht zu stellen. Aber wardt erbetten, und wolt er ledig sein, vertrug er sich umb ain hundert parer guldin und mueste dennost schweren.“

„Der pfarrer von Kraienhainstetten, herr Hanns Mauk, war ain geborner Mösskircher, der war auch zu den ufrürigen zimbrischen pauren gefallen, mit dener er zogen und iren predicant gewesen; derab herr Godtfrid Wernher ain sollichs misfallen, ob gleichwol das glück des pfaffen verschonet, das er an keinem ast behangen, so straft er in doch, und muest S. Martin ain hundert gulden also par an die fabric erlegen, so wol het er den newen glauben gepredihget.“

„In solchem unwert und unwillen besas der pfaff die pfarr etwas mehr, dann ain jhar, und trueg herr Gotfridt Wernher nit ain geringe beschwerdt ab des pfaffen bösen worten. Dieweil im aber nit gepürn wollte, den pfaffen offenlichen zu straffen oder von der pfarr zu vertreiben, warde desshalben mit herr Schweikharten von Gundelfingen ein heimlicher verstandt gemacht, und uf ain zeit, als der pfaff ganz aller sorgen frei, mit vollem seckel seinen geschefften nachrit, warde er unversehenlich gegen aubents uf dem weg von etlichen unerkannten reutern verkuntschaft und ufgefangen, uf ain ross gebunden, ain kappen angestreift, biß in die nacht in den helzern durch vil abweg gefüert. Letzstlich kamen sie mit ime umb miternacht uf die Alb zu aim hochgericht, nit fer von Hapsperg gelegen; sie füertenn in mit dem ross under das hochgericht, thetten im abb die kappen, legten im dagegen ain strick am hals, mit ainer ceremoni, als ob sie in gleich henken welten, mit ausstrücklichen worten, sie w lten im also hiemit posess uf die pfarr zu Geggingen geben. Dem pfarrer war die pfeifen in die eschen gefallen und row in übel der hochmüetingen reden, so er hievor mehrmals getriben; kunte wol bedenken, das im hiemit nit unrecht beschach. Derhalben patte er sie ganz demüetigclichen, iim zu verzeihen und sich seiner zu erbarmen, mit dem verhaißen, die pfarr Geggingen inerhalb monatsfrist zu verlassen. Darneben gab er inen freie wilens also par ein hundert guldin, die bei im in ainem wetschger verkuntschaft waren.“

„Also erbarmbten sich die gueten, mageren reute le des pfaffen, namen das gelt und sein erpieten mit guetem willen an. Sie füerten in verbutzet und vermumpt in helzern biß gegen tag, do ließen sie in in dem Geginger waldt wider ledig. Het gleichwol vil gueter jegerstraich darzu ingenomen, und war im wol geschrepft worden. Er blib hernach ein kurze zeit zu Geggingen, dann ime war sein trutz und freche weis vergangen und wollte sich seins abts vertröstungen weiter nit verfieren lassen. Er zog ganz unverzogenlich ab und kam uf ain andere pfarr under den Hailigenberg, wolt kainer sollichen schlapp mere erwarten. Hernach ist der spann zwischen der Reichenow und der herrschaft Zimbern desshalben vertragen worden, und das ie ain tail umb den anderen die nomination und collatur der pfarr zu Geggingen haben soll. Dessen sein baide herrn wol zufriden gewesen, ist auch also biß anhere gehalten worden.“

„Es het ein fraw, hieß …, sampt irer dochter vor etlichen jaren zu Oberndorf am Necker gewonet, die war ihres übelhaltens, auch das sie und ir dochter des hexenwerks halb so gar hoch im verdacht, zu Oberndorf nit wol sicher, muste sich vor herrn Wilhelmen Wernhern von Zimbern, der dozumal diese herschaft inHet, besorgen, das sie gefengclich angenomen und villeucht weiter irem beschulden nach mit inen gehandelt würde. Derhlben tratten sie uß, enthalten sich hin und wider, wo sie konten. Indes, als herr Wilhelm Wernher sich an das cammerge icht thette, do übergab er die herrschaft seinem brueder, herr Gotfriden Wernhern, wie hiervon auch gemeldet. Wie nun ein newer herr zu Oberndorf, do erkeckt die jung dochter auch wider, dann ir muetter hiezwischen auch [gestorben war]; und dieweil villeucht die amptleut daselbs von irem herren, herr Gotfried Wernhern, kain sondern bevelch irenthalben bekommen, der auch für sich selbs ein abschewens ab solichen hendeln, do verhofft dieselbig auch dester sicherer zu sein, thette sich nach und nach wider geen Oberndorf und wandlet in der ersten haimlich, hernach aber offentlich dahin; sich hielte, do ward auch das alt geschrai und der verdacht dester ehe vergessen und veraltet.“

„Standt also etlich zeit an, das sie geen Schiltach sich zu eim würt, hieß Hanns Schernle, verdigt. Die het nun vil jar ein sollichen unrainen, bösen incubum an ir gehapt, der wolt sie izmals auch nit verlassen, sonder volgt ir nach geen Schiltach. Da trib er wunderwerk im würtshaus mit seinem ungeheuren wesen, auch pfiff er und macht den leuten zu danz. Dergleichen affenspil trib er vil. Das fieng an uf unser Frawen tag irer verkündigung. Das weret so lang, das der würt zu letst merken must, das die sachen mit seiner kechin und disem gespenst nit recht zugiengen. Derhalben gab er ir urlaub, wolt sie nit mer wissen im haus. So wollten die obrigkaiten auch nit darzu thuen, bei zeiten und ehe der schad beschhach. Damit gieng es auch, wie hernach folgt. Und unangesehen das die kechin sich von Schiltach het gethon und widerumb geen Oberndof kam so blib doch der gaist zu Schiltach. Da trib er sein alte weis mit pfeifen und anderm, ließ sich auch merken, seitmals man ime sein bulschaft aldo vertriben, so wellte er das stettlin verbrennen. Aber man achtet sein nit und ließ es ain red sein. Das stand also an biß uf dEn hailigen grönen dondersdag. Do ward die kechin zu Oberndorf gesehen mit andErn leuten zu dem sacrament geen. In der selbigen stunde ist sie auch zu Schiltach gesehen worden, gleichwol beide stettlin uf drei großer stund wegs von ainandern sein gelegen, hat sich angenomen, etwas alda im haus vergessen haben. Man hat ir sonders nicht geachtet, sie hat ir gefert oben uf der binin im würtshaus gehapt. Nit mag man wissen aigentlich, wie, es ist das haus ainsmals angangen und vol feurs gesen. Das hat sobald nit megen gelöscht werden, es sein die andern heuser darunder und darob auch angangen. So hats der luft über die gassen hinüber getriben, das in somma das ganz stetlin verbronnen ist biß an ain haus. Es ist ein eerbermbclicher, erschrockenlicher anblick gewest darum, dann ich selbs (Froben Christoph von Zimmern) innerhalb achtagen darnach aldo durchgeraist und das gesehen. Herr Wilhelm Wernher freiherr zu Zimbern war dozumal solliches grönen dondersdag zu Alperspach im closter bei apt Ulrichen, der hat die brunst gerait sehen megen und darbei abnemen, das es des gespents halb die gestalt gehapt und darauß sei ervolgt, wie oblaut, und man dessen lange zeit in sorgen gestanden.“

„In aller prunst und jammer do ist die kechin zu Schiltach verloren und uf selbige zeit widerumb zu Oberndorf gesehen worden. Uf den beschehnen nachtail und verderplichen schaden do sein der welt erst die augen ufgangen, das man sie zu letst zu Oberndorf, als das geschrai ie so groß worden, gefangen und peinlich gefragt. Do hat sie alle sachen bekennt, wie ergangen, namlich, als sie zu Schiltach zu irem incubo kommen, hab ir derselbig uf der binin in des Schernlis haus ein hafen voller wust geben und sie gehaißen, den umzuschitten, mit vermelden, wover sie das thuen, werde das haus und die statt gleich darauf an und in grundt abbrinnen. Das hab sie nit gleich thuen wellen, sondern sich dessen gewider. Do hab er ir so guete wort geben, darneben auch ain betrawung angehenkt, das sie sollichs zum letsten hab gewagt und darauf den hafen umbgestoßen. Do seie es gleich eitel feur umb sie worden. Weiter künde sie nit wissen, wie es zugegangen, dann sie gleich darauf ain alten besen erwüscht, darauf sie gesessen, darvon gefaren, und seie ganz heimlich, das sie von niemands gesehen, widerumb geen Oberndorf kommen. Nach langer erkundigung deren sachen, hat sie herr Gottfridt Wernher fürstellen und peinlich zu Oberndorf beclagen lassen, auch entlichen lassen verbrennen. Ist gleich nach ostern in obbemelem jar beschehen.“