Seite:Stoltze-Gedichte-1 132.jpg

Was ich gefiehlt im Herze mei
Von jugendlich wonnige Flamme, –
So muß em alte Postknecht sei,
Em alte, weiland stramme,
Trifft der im Eisebahnhof drei
Mi’m Markschiffer zusamme.

Sei schee un sinnig Sprichwortsträußi
Hat Frankfort sich noch uffbewahrt;
„Ich bin eweck wie’m Kraft sei Häusi“
Is ääch noch so e Reddensart.

Wann merr sich iwerrascht verwunnert,
Da segt merr so, noch heut zu Dag,
Doch wääß kaum ääner unner hunnert
Woher des Sprichwort komme mag.

Zur Zeit der Haarschwänz un Barricke
Un Krolleköpp von Gääsehaarn,
Mit Puder druff, mit fingerschdicke,
So daß se ääch noch schimmlich warn.