Seite:Stoltze-Gedichte-1 369.jpg

Was is Neapel mit seim Golf? –
Bleib hie! un reit’ derr ja kään Wolf!
Des bissi Meer mit Ischia,
Mit Capri un mit Procida, –
Drei Insele, – was guckt merr viel?
Die hat ääch unser Brickemihl!
Un der Vesuv, – des bissi Rääch!
Des könne unser Bäcker ääch!

Un Stambul mit seim Bosperus
Un goldern Horn, was is es? – Stuß!
Skutari dribb, – was mir draa leiht!
Ich schenk en die asjatisch Seit!
Ääch Frankfurt hat sei Hibb un Dribb
Und’s is net halb so weit enibb;
Merr bleibt da in seim Weltdhääl doch; –
So fremde Kerl, des fehlt ääm noch!

Un uff dem Rigi in der Schweiz, -–
Guckt merr de Mää? – Krieh’s beese Kreiz!
Nix guckt merr als nor sibbzeh See,
Un wo merr higuckt, nix als Schnee,
Kään Rieweacker un kää Korn, –
Die Jungfrää nor und’s Wetterhorn;
Kään Lattche un kään Zellerie
Als wie am Fuß vom Mühlbeerg hie!