Seite:Stoltze-Gedichte-1 371.jpg

Der leiht im Frankforter Gebiet,
Un wann er ääch net alpegliht
Un net bis in die Wolke steiht,
Geschieht des aus Bescheidenheit.

Korzum, es is uff dere Welt
Kää Plätzi, was merr so gefällt!
Merr guckt ins enger Vatterland
Un hat gleich alles bei der Hand;
Wääß jeden Thorn un Bääm un Ast
Un kennt sich aus bis Wickert fast;
Merr guckt sich’s aa mit Seeleruh
Un braucht kää Landkaart net derrzu.

Es war emal e Iserlitt,
Dem war sei Frää zuwidder;
Sie war so gehl als wie e Quitt
Un war ääch grad so bitter;
Ääch geizig net e bissi bloß
Um ebbes abzuzwacke:
Ihr Kuchels warn net halb so groß
Wie annern Leit se backe.

Doch äämol hat se was geleist,
E Kuchels in em Pännche,
Die war schon mehr Gespenst un Geist
Von em e Heinzelmännche.