Seite:Stoltze Gedichte in Frankfurter Mundart 2 274.jpg

Daß err den Blatz verkaäft, uff dem der Baam hie stieht!“ –
Ach, die Zwarch-Klappergass, worum is se verschwunne?
Ringsum die Nachberschaft bedauert dief ihrn Storz,
Un Trauer aagelegt hat uff dem Ritterbrunne
Der Ritter un sei Roß, sie sein derr schunn ganz schworz.
Un uff dem Bumbestock am Dhiergaarte des Herschi,
Verwittert ohnedeß, es is ganz fahl un blaß;
Wo guckt des jetz nor hi, des aarme alte Berschi?
Es guckt jetz in e Loch, dann’s fehlt die Klappergass!
Uns bleibt allaans der Trost: merr hawe se besesse!
Un hat der Reiffestää se aach net abgemalt,
Kaa Klappergässer werrd se jemals doch vergesse,
Un was die Hääptsach is: die Stadt hat se bezahlt!

Ei was? ei was? e eisern Brick!
E eisern Ower-Määnern?
Merr wolle e gediege Stick!
Merr wolle nor e stäänern.

„No gut, so baut uns ää von Stää,
Von rothe odder weiße.“
Noch lang net! dann jetz wolle merr kää!
Jetz wolle merr ää von – Eise!